மாற்றம் வேண்டும்

மாற்றம் வேண்டும்! மாற்றம் வேண்டும்!!
(ஏ)மாற்றம் மாறிட, மாற்றம் வேண்டும்!
சாதி சமய சலசலப்பின்றி சாந்தமாய் உலகம் மாறிட, சமத்துவமான மாற்றம் வேண்டும்!

அரசியல்வாதிகள் அன்புடன் உழைத்திட,
அரசியல் பூசல்கள் மறைந்திடும் மாற்றம் வேண்டும்!
புதுமைப் பெண்கள் இரவில் இடம்பெயர,
ஆண்களின் அணுவிலும் மாற்றம் வேண்டும்!

கல்வியளித்திட மனிதம் வளர்த்திட,
இயந்திர ஆசிரியர்களிடமும் மாற்றம் வேண்டும்!
பழமையைப் போற்றிட புதுமையைப் பெருக்கிட,
மக்கள் மனதிலும் மாற்றம் வேண்டும்!

கற்களை வைத்து கடவுளை படைத்திடும்,
சிற்பியின் கலையிலும் மாற்றம் வேண்டும்!
சொற்களை இணைத்திட உணர்ச்சிகள் ஊட்டிட,
கவிஞனின் சிந்தனையிலும் மாற்றம் வேண்டும்!

ஆஹா! மாற்றம் வந்தது, மாற்றம் வந்தது!!
நாட்காட்டியில் மட்டுமே மாற்றம் வந்தது!!!
பிறந்தது குழப்பம், 2020!

மாற்றம் வேண்டும்! மாற்றம் வேண்டும்!!
(ஏ)மாற்றம் மாறிட மாற்றம் வேண்டும்!
வாழ்க பாரதம்! வந்தேமாதரம்!!